ALCALDÍA - CONCELLERÍA DE CULTURA, DEPORTES E XUVENTUDE
Acto institucional "Día da Patria Galega"
26 de xullo de 2010
Dulce Mª López Rivera, autora da declaración institucional "Día da Patria Galega 2010".
Foto monumento Parque Lineal Río Cádavo
Un ano máis o Concello de Fene, dende a Concellería de Cultura, Deportes e Xuventude, realizou o pasado sábado, 24 de xullo, o acto institucional para conmemorar o "Día da Patria Galega".
Este acto consistitu na colocación dun ramo de flores no monumento do Parque Lineal Río Cádavo xunto coa actuación da Rondalla Estrelecer e na lectura da declaración institucional realizada pola escritora Dulce López:
PEREGRINO
Non pases sede, peregrino,
que vés da Irlanda ou da Bretaña
navegando longos días e infindas noites
entoando antigos himnos celtas
ata chegar á nosa costa ártabra.
Non te deteñas, peregrino,
anda o camiño sen demora
(a gorxa seca espera e cala
e non se laia dos atrancos do camiño)
Na túa andaina a Santiago
has parar na terra dos nobres fidalgos
e das enormes grúas que apreixan o ceo.
Sumiraste nun sono hipnótico
nos campos que branquean as limpas lavandeiras
e probarás as froitas gorentosas
das que nunca esquecerás o seu recendo.
E xa non pasarás máis sede, camiñante,
cando o xeneroso río Cádavo
encha os teus beizos de frescura.
Daquela saberás que estás en Fene,
pobo tan sufrido e tan festeiro,
que te acolle agora, peregrino,
e despois, facendo patria,
partirá contigo a Compostela.
Dulce Mª López Rivera.
No 25 de Santiago, Día de Galicia.
